Nagpanugyan ang Bacolod City Police Office sa mga tagasuporta sang mga kandidato sa 2019 midterm elections nga indi pag-personalon ang eleksyon subong nga nagahilapit na ang piniliay.
Suno kay BCPO spokesperson Police Lieutenant Ariel Pico, ginpasalig sini nga 100 porsyento na nga handa ang mga pulis sa Bacolod sa May 13 midterm elections.
Kada semana suno kay Pico, may yara sang emergency conference ang napulo ka mga police stations kag Mobile Group agud istoryahan ang preparasyon sa eleksyon.
May yara man sang mga pulis nga ginsaylo sa iban nga lugar bangud may mga himata sila diri nga nagapadalagan.
Sa mga supporters sang mga kandidato suno kay Pico, ginpanugyan sini nga wala lang sang personalan bangud malipas man lang ang eleksyon, sa baylo magboto santo sa konsensya.
Samtang, handa naman sa karon ang Oplan Summer Vacation sang BCPO.
Ginhugtan naman ang seguridad sa mga simbahan sa ciudad kasunod sang natabo sa Jolo, Sulu.
