Nagpalab-ot sang pagpakig-unong ang bise alkalde sang banwa sang Moises Padilla, Negros Occidental sa nagtaliwan nga principal sang Guinpana-an Elementary School nga kasilingan kag anay nangin manunudlo man sini.
Sa interview sang Bombo Radyo Bacolod kay Moises Padilla Vice Mayor Ian Villaflor, si Reynaldo Mojares nga napatay kasunod sang pagkahulog sa atop sang isa sa mga classrooms ang kalapit lang nila sang balay.
Sang siya ang naga-eskwela sa Guinpana-an Elementary School nangin manunudlo man sini si Mojares.
Tubtob nga magsaka sang pwesto kag ini ang nangin principal kag na-assign sa nagkalainlain nga eskwelahan.
Sa ulihi, nabalik si Mojares sa Guinpana-an Elementary School bilang principal.
Sila ang ulihi nga nagkit-anay sang maghulam ang Bise Alkalde sang covered court sang eskwelahan para sa ila family reunion.
Pahayag ni Villaflor nga masami kaagahon pa lamang sa pagpangape, ginahapitan gid sang principal ang eskwelahan.’
Ini man ang ginalantaw sini nga rasun nga bisan Domingo, ini ang boluntaryo nga nagsaka sa atop sang makita nga madamo pa sang sagbot bangod pagka-aga, umpisa na sang klase para sa School Year 2024-2025.
Ginakasubo sini nga sa pagpanaog, natumba ang kahoy nga hagdan kag nalampos ang ulo sini sa matig-a nga bagay.
Panugyan na lamang sini sa mga principal nga kun may kaangay nga aktibidad kaangay sang Brigada Eskwela, sarang gid ang mga ini nga makatap sa Barangay, bangod madamo man sang mga volunteers.
