BACOLOD CITY – Madinalag-on nga napatigayon ang grand performance night sang Bombo Music Festival 2019 sa ciudad sang Iloilo kagab-i.
Napuno sang tumalan-aw kag mga executives kag personnel sang Bombo Radyo Philippines ang Rose Memorial Hall sang Central Philippine University sa distrito sang Jaro agud saksihan ang 12 ka mga finalists sa ila nga pagpasundayag sa Bombo Music Festival, a song-writing competition of Wholly Original Melody and Lyrics.
Nasaksihan ang world class live performance sang mga finalists sa musiko sang Bombo Radyo Symphony Orchestra.
Pasado alas 7:00 sang gab-i nagsugod ang programa kun sa diin nangin emcee ang anchor sang Kahapon Lamang sang Bombo Radyo Bacolod nga si Bombo Jaz De Jesus Madrigal kaupod si Tomas Daroy ukon mas kilala nga si Star DJ Allan, ang manager sang Star FM Dagupan.
Kag matapos ang binulan nga paghulat, kag ginatos nga gingasto sang mga nagboto paagi sa text kag online, ginkilala nga champion sang BMF 2019 ang Finalist number 11: “Ngano” by LJ Manzano sang Mintal, Davao City kun sa diin nagbaton ini sang P250,000 cash kag trophy.
First runner-up ang Finalist number 12: “Bagyo” by Gian Carlo Torres sang Quezon City nga nagbaton sang P175,000 kag trophy kag 2nd runner-up ang Finalist number 3: “Mahal ka ng Mahal ko” by Regine Tok sang Mintal, Davao City nga nagbaton naman sang P125,000 kag trophy.
Nangin best interpreter naman si Jay’R Oclarin para sa kanta nga “Ngano” kun sa diin nagbaton naman ini sang P30,000 kag trophy.
Apang wala sang nagpauli nga masubo bangud tanan nga finalists ang nakabaton sang P75,000 nga consolation prizes.
Lakip sa panel of judges amu si Professor Ryan Cayabyab nga ginakabig “Maestro”, si OPM legend nga si Jim Paredes sang APO Hiking Society, Fr. Jun Borres nga isa ka Jesuit Musician, composer kag lyricist, Isabella de Leon nga isa ka singer, songwriter kag aktres kun sa diin nakilala ini bilang Duday sa sitcom nga “Daddy Di Do Du” kag si Jayson Fernandez nga anay frontman sang Rivermaya kag nangin finalist man sang “The Voice”.
