BACOLOD CITY — Ginpasidunggan sang provincial government sang Negros Occidental ang Bombo Radyo Bacolod sa bulig sini sa pagkolekta sang dugo paagi sa ginapatigayon nga Dugong Bombo tagsa bulan sang Nobyembre.
Nagaisahanon ini nga estasyon sang radyo sa Bacolod kag Negros Occidental nga ginhatagan sang pasidungog kadungan sang 4th Provincvial Sandugo 2017 Pagkilala kag Pagpasalamat nga ginhiwat sa SMX Convention Center kahapon.
Ang Bombo Radyo Bacolod nagbaton sang Certificate of Recognition, paagi sa Provincial Health Office, kag gintan-ayan man sang Outstanding Non-LGU (local government unit) Award bangud sang madamo nga units sang dugo nga matipon sa isa lamang ka adlaw nga blood-letting activity.
Nahibaluan nga kapin 400 ka successful blood donors ang natipon sang tinalikdan nga Nobyembre kun sa diin naguba sang Bombo Radyo ang kaugalingon sini nga record sadtong 2015.
Ang pagkilala ginbaton sang Bombo Radyo Bacolod, paagi sa station manager nga si Bombo Mary Divine Grace Cuello.
Ang Provincial Sandugo Awards ginapatigayon tagsa tatlo lamang katuig.
Ang Bombo Radyo isa sa mga malapit 400 ka mga ginpasidunggan sang provincial government.
Suno kay Department of Health Executive Assistant III Denise Ensenares, ginkilala man sa 4th Provincial Sandugo 2017 Pagkilala kag Pagpasalamat ang 32 ka mga LGUs sa probinsiya, 229 ka mga barangay, napulo ka municipal health officers, napulo ka district recruitment officers, 99 ka galloners, kag anom ka non-LGUs sa diin nalakip ang Bombo Radyo.
Suno kay Ensenares, ang pagbuligay sang nagkalain-lain nga sektor, nakaangkon sang luwas kag bastante nga suplay sang dugo para sa tanan nga nagakinahanglan.
Masami nga ka-partner sang provincial government sang Negros Occidental sa blood program sini ang Bombo Radyo Bacolod rason nga nalakip ini sa mga ginpasidunggan sa ginhiwat nga 4th Provincial Sandugo 2017 Pagkilala kag Pagpasalamat kahapon.
Ginpahayag ni Provincial Health Officer Dr. Ernell Tumimbang, sa amo nga kahiwatan, nga ginapatigayon lamang tagsa tatlo katuig, ginakilala ang tanan nga ahensiya sang gobyerno kag pribado nga sektor nga nagapakigbahin sa pagtipon sang madamo nga units sang dugo.
Ginpabutyag ni Tumimbang nga indi lamang isa ka kabuhi ang maluwas sang isa katawo kun ini ang mangin isa ka blood donor bangud magluwas sa iya kag sa iya mga himata, indi naman mabudlayan ang iban nga nagakinhanglan nga magpangita sang suplay sang dugo sa tion sang emerhensiya.
Ginakalipay naman ni Dr. Tumimbang nga wala na sang pagbaligyaanay sang dugo nga nagaluntad sa probinsiya sa karon bangud sang kampanya sang nagkalain-lain nga ahensiya sang gobyerno para sa partisipasyon sang publiko sa blood-letting activities.
Nahibaluan nga sadto, malaba ang pila sang mga blood donors sa regional hospital bangud ila ginabaligya ang mga ini sa mga pasyente.
