Pabor ang pamunuan sang Bacolod Traffic Authority Office (BTAO) sa pagtukod sang Bacolod Traffic and Transport Management Department (BTTMD) agud makahatag pa sang mas maayo nga serbisyo.
Sa interview sang Bombo Radyo Bacolod kay BTAO Deputy Head Jose Antonio ‘Jojo’ Robello, sa tion nga mangin isa na ka departamento, magadako naman ang budget nga sarang magamit.
Suno diri, sa karun nga sila ang yara sa idalum sang Office of the Mayor, sa kada hulag nila kaangay sang pagpinta sang mga street signs kag pagrepair sang street lights sila ang nagarequest pa kag masami ginakulang pa sa pondo.
Nagasalig naman sila sa judgement kag knowledge ni Bacolod City Mayor Alfredo ‘Albee’ Benitez sa pag-appoint sang magapanguna sa departamento.
Sa karun nga napasar na sa 3rd kag final reading sang konseho ang hagna, ginabalay na lamang ang budget allocation para sa masunod nga tuig, nga ila na ginatugyan sa kaalam sang mga konsehal.
Sa pihak nga bahin, islan naman sang pangalan ang traffic enforcers kag ini ang pagatawgon na nga traffic aid, apang paathag ni Robello nga ang label lang ang gin-islan kag amo gihapon ang ila nga function.
Ginapasalig man sang mga ini nga ang departamento ang may specific number man sang personnel kag qualification.
Isa sa una nga ginalantaw sa pagtukod sang departamento amo ang maregular na bilang government employee ang mga traffic aid.
Sa karun, focus sang BTAO ang 3Es ukon Engineering, Enforcement kag Education.
Pahayag ni Robello nga sila ang magafocus naman sa Education bangod nagapati ini nga indi salawayon ang mga driver sa baylo ang mga ini ang kulang lamang sang ehibalo sa traffic rules bangod madamo sang naglabay lamang sa fixer sang magkuha sang mga permits kag lisensya.
