Nagakalisod ang bilog nga Department of Education (DepEd) division of Negros Occidental sa pagtaliwan ni Reynaldo Mojares, principal sang Guinpana-an Elementary School sa banwa sang Moises Padilla, Negros Occidental
Si Mojares ang nahulog gikan sa atop sang isa sa mga classrooms matapos magpaninlo sang Domingo.
Sa interview sang Bombo Radyo Bacolod kay Ian Arnold Arnaez, public information officer sang DepEd Negros Occidental, sa feedback nga nakuha nila gikan sa mga nakaupod sini sa eskwelahan, mapisan kag mabuot nga sahi sang principal si Mojares.
Pamatuod sini ang liwat niya nga pagsaka sa classroom sang makita nga may-ara pa sang mga laya nga dahon.
Suno kay Arnaez, makita sa principal ang iya dedikasyon sa trabaho bangod luyag gid sini personal nga maseguro nga presentable ang eskwelahan sa opening of classes sang Lunes.
Paathag sini nga una na nga nakapanglimpyo ang principal upod sa utility kag iban nga manunudlo sang aga sang Domingo, apang sang hapon sa pagsugat na sini kuntani sa iya asawa nga isa man ka manunudlo, didto sini nakit-an nga may mga sagbot pa sa atop.
Apang bangod wala na sang kaupod, wala naman sang maka-uyat sa hagdan gani ini ang natumba sang siya ang magapanaog na kuntani.
Ini ang nagresulta sa iya nga pagkahulog kag pagkalampos sang ulo sa matig-a nga bagay.
Pasalig ni Arnaez nga ang DepEd Negros Occidental Division Office ang maga-assist sa pamilya nga nalisdan kasubong man sa mga benepisyo nga dapat sini mabatun.
Paathag ni sini nga gina-asikaso naman ang papelis para sa retirement ni Mojares antes paman matabo ang insidente, gani ini ang tapuson na lamang.
Pahanumdom sini sa mga kabataan kag ginikanan, nga apisar sa insidente, magapadayun ang klase sa Guinpana-an Elementary School.
Samtang wala pa sang may nadesignate nga bag-o nga principal, ang division office ang magabutang anay sang officer-in-charge para sa eskwelahan.
