Gin-evacuate ang pila ka mga residente nga nagapuyo malapit sa Mount Kanlaon kasunod sang paglupok sang bulkan alas-6:51 kagab-i.
Suno sa Philippine Institute of Volcanology and Seismology (Phivolcs), 5,000 meters ang kataason sang aso kag abo nagikan sa bulkan kasunod sang phreatic eruption.
Suno sa PHIVOLCS, nagluntad ang eruption alas-6:51 sang gab-i kag nagdugay sang anom ka minutos.
Duha naman ka volcanic earthquakes ang narecord pagkatapos sang eruption kag nareport ang ashfall kag baho sang sulfur sa mga barangay nga yara ssa western slope sang bulkan.
Suno sa PHIVOLCS, ang Kanlaon ang naga-exhibit sang above background earthquake activity halin sang tinalikdan nga binulan kag nagasungaw diri ang anomalous SO2 nga ginabanta nagadangat sa 1,273 tons kada adlaw.
Gilayon naman nga ginpasaka sang PHIVOLCS sa Alert Level 2 ukon increasing unrest sa Kanlaon Volcano.
Sa interview sang Bombo Radyo kay Glemar Homecillo Martizano, 17 anyos nga grade 9 student kag residente sang Brgy Mabigo, Canlaon City, may nabatyagan nga paglinog kag may nabatian nga pagdaguob sa lugar sang naglupok ang bulkan.
Suno diri, matapos ang nabatian nga pagdaguob nagsala na ang mga tawo sang makit-an ang itom nga aso nga naggwa sa bulkan.
Kasunod sini, naghuni ang siren kag nagpaalerto ang ciudad sa mga residente.
