Gloomy para sa Business sector ang mangin dalagan sang ekonomiya subong nga 2025.
Sa interview sang Bombo Radyo Bacolod kay Metro Bacolod Chamber of Commerce and Industry chief executive officer Frank Carbon, sa karun consumption economy ang Pilipinas bangod mas nangin focus ang service sector kag napabay-an ang agriculture kag manufacturing sector sang 2024.
Sa karun ang nagalukdo na lamang sa pungsod amo ang billion pesos nga remittances gikan sa mga overseas Filipino workers, seafarers kag iban nga Pilipino nga yara sa abroad kag nagapadala sa Pilipinas.
Kasubong man ang mga Business Process Outsourcing nga nagapasulod sang kwarta gikan sa gwa, turismo, kag hotel and restaurants.
Sa pihak sini, wala na natutukan ang agrikultura kag manufacturing.
Suno diri, low-paying jobs lamang ang nagaka-offer nga trabaho sa service sector.
Indi naman matingala si Carbon kun ngaa ang Pilipinas ang 40 ka tuig na nga nagapangot sa Lower Middle Income status.
Nakita sang mga ekonomista, kalabanan sa mga Pilipino ang may manubo nga family income, ginakulang sa healthcare kag wala sang nagakaigo nga nutrisyon kasubong man dyutay ang oportunidad sa disente kag secured nga trabaho.
Dugang pa sini nga nagahilapit ang 2025 Midterm Elections kun sa diin ang focus sang mga politiko amo ang maghatag sang ayuda, nga makatuga sang inflationary effect sa pungsod.
Ini bangod ang kwarta ang wala sang balik nga income, kag ini ang ginagastos lamang.
Magaresulta ini sa pagsaka sang presyo sang mga balaklon.
Ang sitwasyon ang ginalantaw na ni Carbon nga magalawig sa sulod sang anom ka bulan subong nga 2025.
Paathag sang negosyante, nga ang gobyerno ang dapat maghatag focus sa agrikultura kag mga proyekto nga makagenerate sang trabaho. SAMTANG….
Nagapati ang labor group nga magapadayun pa ang malala nga kapigaduhon kag kagutom sa 2025.
Sa interview sang Bombo Radyo Bacolod kay General Alliance of Workers Association (GAWA) Secretary-General Wennie Sancho, ang ginhatag nga wage increase ang naalimunaw lamang sang pagnubo sang purchasing power.
Gani padayun ang panawagan sang mga ini nga makapasar sang National Living Wage bangod wala sang masaligan sa Regional Wage Board nga nagapasar sang wage increase nga indi makabatak bisan sang kapierdihan sa purchasing power na lamang.
Kasubong man ang sektor sang kalamay nga apektado gihapon sang Sugar Import Liberalization, nga tubtob sa karun indi mahatagan sang alibyo.
Suno kay Sancho, sa karun tuman ka gamay sang mill gate price sang tubo samtang apektado naman ang supply.
Ginalauman na sini nga mangin taklaron ang 2025 ilabi na nga ang polisa sang gobyerno ang wala nagasanto sa ginatarget nga economic growth.
Isa diri ang pagtamper sa pondo sang Philippine Health Insurance Corporation (PhilHealth) nga makaapekto sa paghatag sang basic health services.
Ginalantaw sini nga madamo sang indi makatrabaho kun magbalatian kag wala sang pangpabulong bangod wala sang mahatag nga medical attention ang gobyerno.
Dugang pa nga wala man gina-address ang inflation, kun sa diin tuman na ka nubo ang matuod nga value sang piso.
Suno kay Sancho, sa karun dapat may tatlo pasaka nga minimum wage earners sa isa ka balay nga may anom ka miyembro, apang kun nagaisahanon lamang ang worker kag naga-income sang minimum wage, halos indi mapinsar kun paano mapaigo ang budget sa pamilya.
Apang bangod sa kakulang sang effort sang gobyerno, nagapati si Sancho nga madala sa 2025 ang kun ano ang sitwasyon sang 2024, ilabi na nga election period gani lauman na ang magatutok lamang ang kadam-an sang politiko sa ayudad agud mapahamot ang pangalan, apang mapabay-an ang matuod nga problema.
