Wala nagakumporme ang business sector sa ciudad sang Bacolod sa ginaduso sang Senado nga buhinan ang mga holidays.
Sa interview sang Bombo Radyo Bacolod kay Metro Bacolod Chamber of Commerce and Industry (MBCCI) chief executive officer Frank Carbon, indi sini maintindihan ang rason kun ngaa sa pagkadamo sang problema nga ginapangatubang sang sosyodad, ang kadamuon sang holiday ang ginaproblemahan sang Senado nga masolusyunan.
Suno kay Carbon, kuntani pagatutukan ang pagpaayo sa kuryente kag paglab-ot sang food security nga mas may dako nga kontribusyon sa productivity kag competitiveness sang pungsod sangsa pagbuhin sang holidays.
Suno diri, dapat gid nga panubuan ang sukot sa kuryente agud nga magdamo ang mga manufacturers nga magainvest sa Pilipinas nga makahatag sang dako nga bulig sa ekonomiya.
Dugang pa sini, bangud agricultural country ang Pilipinas dapat ang pagpasaka sang produksyon sang mga mangunguma kag mga mangingisda ang ginatutukan sang gobyerno.
Dapat man nga mahatagan sang solusyon sang gobyerno ang pagpasaka sang purchasing power sang mga nagatrabaho sa service industry.
Panawagan sini nga dapat maghimo ang gobyerno sang tikang agud nga masolusyunan ang mga nagapanguna nga problema sang pungsod nga makahatag sang kaayuhan sa mga pumuluyo ukon sa mga mamumugon kag sa ekonomiya.
