Ginkompirmar sang alkalde sang ciudad sang Cadiz nga wala na sang Persons Under Investigation (PUI) angot sa coronavirus disease sa amo nga ciudad.
Sa interview sang Bombo Radyo Bacolod kay Mayor Salvador “Bading” Escalante, ginpahayag sini nga naggwa na ang resulta sang test sa PUI kagab-i kag nagnegative ini kalakip na ang yara sa Barangay Cabahug kun sa diin isa sa mga naidentify nga hot zones sang probinsya.
Ginpahayag man sini nga may yara sang gin-admit nga PUI sa Bacolod apang nagarespond ini sa local antibiotics gani ginapatihan nga indi coronavirus ang ginabatayag sang pasyente.
Dugang man sini nga may yara sang naidentify nga 1,600 ka mga Persons Under Monitoring ukon PUM sa ciudad bangud madamo sang nagpalauli nga halin sa iban nga lugar.
Suno kay Escalante, tuman ka aktibo kag instrikto ang mga Barangay Health Emergency Response Team (BHERT) sa pagpatuman sang pagsulundan sang Department of Health nga Social Distancing kag pag-isolate sang miyembro sang pamilya nga nag-abot nagikan sa lain nga lugar.
Ginpahayag man sini nga may yara na sang magraduate nga kapin 500 ka mga PUM bangud matapos na nila ang 14 ka adlaw nga quarantine.
