Patay ang call center agent nga babayi matapos nga mautod ang lawas sang malapakan sang 10-wheeler truck sa aksidente nga nagluntad sa Arabay 1, Burgos Extension, Brgy. Estefania kapin alas-5:00 kahapon sang kaagahon.
Sa interview sang Bombo Radyo Bacolod kay Police Major Ramel Sarona, pinuno sang Traffic Enforcement Unit sang Bacolod City Police Office, ginamaneho ni Rexis Gallano ang motorsiklo sini angkas ang iya live in partner nga si Jonalyn Lamis padulong sa Burgos Extension sang nag-overtake ini sa ginasundan nga 10-wheeler wing van.
Apang, wala ini gilayon nga nakabalik sa lane kag nabunggo sa sugata nga motorsiklo nga ginamaneho ni Lloyd Arca.
Bangod sa impact nagtabog si Lamis kag nagtupa sa goma sang van kag ini ang nalapakan nga nagresulta sa pagka-utod sang iya lawas.
