Pilason ang isa ka call center agent matapos ginbuno sa isa ka bar sa ciudad sang Bacolod kaina sang kaagahon, December 15, 2025.
Ginkilala ang biktima kay alyas Mike, legal edad, lalaki, call center agent kag residente sang Barangay Banago, Bacolod City.
Ang suspek ang ginkilala kay alias Rofel, 22 anyos, lalaki kag residente sang Barangay Villamonte, Bacolod City.
Siya ang nakaagom sang pilas sa bibig kag sa likod nga gilayon man gindala sang katrabaho sini sa ospital.
Sa interview sang Bombo Radyo Bacolod kay Police Captain Andro Maapni, spokesperson sang Bacolod City Police Office, nagluntad ang stabbing incident pasado alas 12:55 ang takna sang kaagahon, kahapon.
Suno kay Maapni natabo ang pagpamuno sa Luna Art Cafe and Bar sa Calamba St., Barangay 1, Bacolod City.
Suno diri, santo sa imbestigasyon sang Bacolod Police Station 2 nga nagresponde sa lugar sang insidente, nagluntad ini kasunod sang paglalisay sang biktima kag sang suspek sa sulod sang nasambit nga establishmento.
Ginalantaw nga gintunaan sang pagbinaisay amo nga bangud kaagahon na kag yara na sa impluwensya sang makahulubog nga ilimnon may yara sang wala sang pagintindihanay sa magtimbang nga bahin.
Ang biktima ang gilayon man gindala sa ospital nga nakaagom sang pilas sa bibig kag sa likod.
Ang suspek nga isa ka estudyante ang nadakpan sang bouncer sang bar kag ginturn-over man sa nagresponde nga mga police personnel.
Narecover sa lugar sang insidente ang isa ka patalum.
Sa karun ang suspek ang nakahunong sa Bacolod Police Station 2 kag ginahulat pa ang decision sang biktima kun mapasaka ini sang kaso batok diri.
Pahanumdom sang Bacolod City Police Office sa mga pumuluyo nga kun nakainum na sang makahulubog nga ilimnon dapat likawan ang pagbinaisay nga mangin tunaan sang kaangay nga insidente.
