BACOLOD CITY — Nagalaom ang Cansilayan Elementary School sa banwa sang Murcia nga makalusot sila sa Regional Search for the 2017 Best Brigada Eskwela Implementers.
Huwebes sang aga, ginpatigayon na ang evaluation sa amo nga eskwelahan, santo man sa direktiba sang Department of Education Negros Island Region.
Suno kay District Supervisor Mariolina Angelina Galwin (hal-win) sang Murcia 1, nakasulod ang buluthuan bilang finalist bangud sa pagbinuligay sang tanan nga mga stakeholders kaangay sang mga opisyal sang Barangay Cansilayan kag banwa sang Murcia, mga manunudlo, ginikanan kag tanan nga mga pumuluyo sa amo nga barangay.
Kun magdaog ang eskwelahan suno kay Galwin, mangin malipayon kag bugalon ang tanan bangud indi lamang pipila ang nagbinuligay.
Nagalaom naman ini nga mas magadamo pa gid ang mga estudyante sa Cansilayan Elementary School kun magdaog ini sa Regional Search.
Sa bahin sang local government unit sang Murcia, ginpahayag ni Vice Mayor Gerry Rojas nga 100 porciento ang suporta sang banwa sa eskwelahan humalin sang ginpatigayon ang Brigada Eskwela sang bulan sang Mayo tubtub sa karun nga nangin finalist ini.
