May panibag-o na naman nga narecord nga kaso sang “tughong and run” sa Bacolod City.
Ini ang natabo sa isa ka fuel station sa Barangay Taculing sang Miyerkules sang gab-i, kun sa diin nagtughong ang isa ka SUV kag hinali nalang nagpaburhot sang salakyan nga wala nakabayad.
Sa interview sang Bombo Radyo Bacolod kay LTO – Negros Island Region Director Jeck Conlu, ang involve ang isa ka puti nga Nissan Terra nga nagtughong sang masobra P6,000 nga balor sang Diesel.
Natumod naman ang tag-iya sang salakyan paagi sa plate number sini nga nacapture sa CCTV footage sang gasolinahan, kag ini ang residente lamang sa ciudad sang Bacolod.
Indi paman maseguro kun ang tag-iya gid man amo ang nagadrive, apang ini padal-an sang show cause order subong nga hapon.
Suno kay Conlu, hibaluon sa car owner kun sin-o ang driver nga wala nagbayad, kag kun ini ang iban nga persona, ini ang padal-an man sang separado nga show cause order.
Ang mga ginpadal-an sang show cause ang ginahatagan sang lima ka adlaw sa pagreply, kag hinali nga indi makasabat mahimo nga marevoke ang driver’s license kag ihold sang LTO ang salakyan.
Samtang kinahanglan man nga bayaran ang ginpalagyuhan nga gintughong nga Diesel, kag mangatubang man ang driver sang separado pa nga penalties.
Madumduman nga ini ang ikaduha na nga kaso sang “tughong and run” sa Bacolod City subong nga tuig, kun sa diin ang una ang ginhimo sang puti nga Mitsubishi Xpander sang February 27.
