Nagpanugyan ang pinuno sang Bacolod City Disaster Risk Reduction and Management Office (CDRRMO) sa publiko agud malikawan ang heat stroke sini nga summer season ilabi na subong nga Semana Santa.
Sa interview sang Bombo Radyo Bacolod kay CDRRMO head Jomarie Vargas, ginpahayag sini nga likawan gid ang magpainit humalin alas-11:00 sa aga tubtob alas-3:00 sa hapon.
Kun indi naman mapunggan nga magpainit, indi pagkalimtan nga magpasilong kag mag-inom sang tubig agud indi ma-dehydrate.
Dugang pa ni Vargas nga dapat magsuksok gid sang mga komportable nga panapton.
Kun makabatyag naman sang pagsakit ukon paglingin sang ulo, kabudlay sa pag-ginhawa, muscle cramps kag pagmala sang panit, magpahuway gid anay kag magpakonsulta sa doktor.
Pananglitan nga atakehon sang heat stroke kag wala pa nakaabot ang rescue team, paimnon ang biktima sang tubig kag sibinan ini ilabi na ang iya nga agtang kag tangkugo suno kay Vargas.
Nagahingyo man ini sa mga may edad na nga ipaiway na ang paglagaw sini nga Semana Santa bangud kalabanan sa mga nagaka-heat stroke amo ang mga tigulang na.
Suno sa CDRRMO head, magpamalandong na lamang sa tagsa ka mga puluy-an agud makalikaw sa disgrasya.
