Gin-athag sang General Manager sa Central Negros Electric Cooperative (CENECO) nga ginapreparahan na nila ang mga pagpanghangkat sa pagbag-o sa power supply sa ciudad sang Bacolod kadungan sa pagsanyog sang ekonomiya.
Kahapon, ang CENECO ang nagtambong sa Consultative Power Summit nga ginhost sang Negros Occidental provincial government, bilang isa sa mga main player sa power distribution sa probinsya.
Sa interview sang Bombo Radyo Bacolod kay Atty. Arnel Lapore, sa aktibidad nagpatigayon man sang workshop ang CENECO upod sa Northern Negros Electric Cooperative (NONECO) kag Negros Occidental Electric Cooperative (NOCECO).
Ginpatpat man sa programa kun ano ang vision sang CENECO tubtob sa 2030 partikular na sa pagtake-over sang Negros Electric and Power Corporation (NEPC).
Kalakip sa ginapreparahan amo ang pagbag-o sa investment sa ciudad sang Bacolod partikular na sa livelihood, industrial kag iban pa nga naga-apekto sa power consumption.
Ginaseguro sang mga ini kun paano masustiner sang distribution utility kag mahatag ang efficient kag effective nga serbisyo sa mga member-consumer.
Paathag ni Lapore nga sila ang padulong na sa rehabilitation, kun sa diin paga-islan kag i-upgrade ang distribution transformers kag substations.
Aminado ini nga ang pungsod ang wala na sang iban nga option kundi padulong sa renewable energy, bilang sabat sa climate change issue.
Gani amat-amat naman buy-an ang nakaandan na nga paggamit sang fossil fuel ukon coal fired power plant.
Aminado ini nga mabudlay pa sa karun ini nga mapatuman apang may posibilidad gihapon nga mapatuman sa palaabuton.
Apang ginalantaw ni Lapore nga kun magbaylo na sa solar energy, wala sang magamit nga kuryente sa gab-i samtang mas barato naman ang kuryente gikan sa coal fired power plant.
Sa karun ang CENECO ang nakafile na sang motion para sa delivery sang 20 megawatts sang kuryente pinaagi sa geothermal power plant.
Ini ang madugang sa nauna na nga 20 megawatts sang renewable energy nga ginasupply sa CENECO samtang may-ara naman sang 35 megawatts nga ginakuha sa diesel power plant sa Bago City.
Paathag ni Lapore nga 80 tubtob 90 megawatts ang baseload requirement sa CENECO, gani kun mahatag ang ginapangayo nga 20 megawatts, may ara na sang 75 megawatts ang CENECO kag gamay nalang ang kinahanglan nga idugang gikan sa coal fired power plant.
