BACOLOD CITY – Nakuha sang Negrense-based football team nga Ceres Negros Football Club ang back-to-back win sa Philippines Football League (PFL) matapos sini lutuson ang Global Cebu FC sa score nga 6-1, sa Rizal Memorial Football Stadium, kahapon.
Ang Ceres Negros FC ang mangin tiglawas sang Pilipinas sa preliminary rounds para sa 2019 Asian Football Confideration ukon AFC Championship League.
Nagbida sa hampang si Bienvienido Marañon nga nakapa-goal sa ika-20 minuto sang hampang.
Sa ika-36 minutos, nakapasulod man sang goal si Mike Ott, matapos ang tatlo ka minutos, naka-score naman si Omid Nazari.
Indi naman ini ang katapusan sang pagpangabudlay sang Ceres Negros bangud may nagahulat pa sila nga hampang para sa AFC Cup.
Atubangon pa sang Negrense football team ang Home United sang Singapore para sa ASEAN Zonal final nga magasugod sa Agosto 1 nga hiwaton sa Panaad Park and Stadium sa ciudad sang Bacolod.
