Ginapangitaan na sang ciudad sang mahimo nga masayluhan kag maplastaran ang mga sidewalk vendors sa ciudad sang Bacolod.
Sa interview sang Bombo Radyo Bacolod kay Councilor Celia Flor, chairman ang Committee on Markets and Slaughterhouse sa Sangguniang Panlungsod, ginatun-an pa sini kun ano ang posible nga mabulig sang ciudad sa mga sidewalk vendors.
Suno kay Flor, madugay naman nga nadulaan sang palangabuhian ang mga street vendors sa tion pa ni anay President Rodrigo Duterte bangud sa ginapatuman nga road clearing.
Suno diri, may proposal nga ibalik ang mga ini sa dalan Bonifacio apang gin-abisuhan siya sang City Legal nga may yara sang court ruling nga indi mahimo nga pagamiton ang dalan agud nga mabaligyaan, gani nagpangayo ini sang kopya agud nga matun-an.
Ginpahayag man sini nga ginapapangita man sini ang mga vendors sang mahimo nila nga masayluhan.
Suno kay Flor, lantawon nila anay ang iban pa nga legal options para sa masayluhan sang mga sidewalk vendors.
