BACOLOD CITY – Hugot nga nagabantay ang Coast Guard Station Bacolod batok sa pagsulod sang Maute Terror Group kag iban pa nga malain nga mga elemento.
Ini ang ginpahayag ni CGS-Bacolod Head Lt. Senior Grade Jimmy Oliver Vingno kasunod sang pagkaarestar sa tatlo ka gin-alegar katapo sang Maute Terror Group sa pantalan sa Iloilo kahapon.
Ginpasiguro ni Vingno nga naka-heightened alert ang Philippine Coast Guard kag hugot sila nga nagabantay sa tanan nga mga pwerto sa probinsiya bangud wala sila nagakumpiyansa nga wala na diri ang mga terorista.
Suno sa CGS-Bacolod head, nagapatigayon sila sang koordinasyon sa Philippine National Police kag Armed Forces of the Philippines agud masiguro nga indi makasulod kag makasabwag sang kalakasan sa Bacolod kag Negros Occidental ang mga terorista.
Hugot man sila nga nagatsekyar sa mga barko nga gikan sa Mindanao kag sa tion nga may mabaton sila sang impormasyon tuhoy sa pagpadulong diri sang mga Maute members, gilayon sila nga magapatigayon sang inspeksyon sa masulod nga mga barko kag kun makumpirmar, ila ini arestuhon.
