Ginpasalig sang Chairman sang Commission on Elections nga makaboto ang mga evacuees sang Bulkan Kanlaon.
Si Comelec Chairman George Erwin Garcia ang personal nga nagpadulong sa evacuation center sa ciudad sang La Carlota, Negros Occidental kaina sang aga.
Sa interview sang Bombo Radyo kay Garcia, ang ila nga pagkadto sa area ang indi lamang agud tsekyaron kun paano ipahamtang ang makeshift polling precinct, kundi agud ipabatyag man sa mga evacuees nga seguruhon nga sila ang makaboto apisar sa kalamidad.
Wala naman ini makasaka sa banwa sang La Castellana, bangod sila ang nagpatigayon pa sang pagpirma sang Memorandum of Agreement sa Office of Civil Defense sa Negros Occidental Provincial Capitol.
Apang kaangay man ang iya nga pasalig sa mga botante nga yara sa evacuation centers sa banwa sang La Castellana.
Ang kasugtanan sa tunga sang COMELEC kag OCD ang agud mapasanyog pa ang ila koordinasyon sa mga lugar nga gin-igo sang mga kalamidad agud indi maapektuhan ang schedule sang eleksyon.
Kaina, ginpatigayon man ang testing sang mga Automated Counting Machines.
Apisar sa nagluntad nga mga engkwentro sa tunga sang militar kag rebelde nga grupo, ginpasalig ni Garcia nga indi pa apektado ang status sang probinsya bangod wala paman ma-establishar nga ang mga engkwentro ang election-related.
Pasalig sini nga kontrolado sang COMELEC ang sitwasyon.
Samtang aminado man ini nga madata ang baklanay sang boto, apang sa karun mas proactive na ang COMELEC sa pagpanakop.
Kun sa diin indi na kinahanglan sang complaint, kag kun makita nila sa social media ang mga post nga may pamatuod kaangay sang picture ukon videos mahimo nga ini ang madeklarar na nga vote buying.
Sa una nga tikang, sila ang magapadala sang show cause order, nga mahimo magsaka sa disqualification.
Panawagan naman sini sa mga kandidato kag iban pa nga updan ang patigayunon nga final testing kag sealing sang mga ACMs sa Mayo 2 tubtob 7.
