Ginpahayag ni Commission on Election – Negros Island Region Director Atty. Lionel Marco Castillano, nga wala sang rekomendasyon halin sa Regional Joint Security Command Center nga ipaidalum sa COMELEC control ang duha ka area sa Negros Oriental nga nasulod sa red category sa election watchlist.
Sa Negros Oriental, napaidalum sa red category ang ciudad sang Guihulngan kag banwa sang La Libertad samtang may isa nga yara sa orange category nga amo ang banwa sang Busay.
Samtang, sa Negros Occidental naman may yara sang isa nga nasulod sa orange category nga amo ang banwa sang Candoni samtang sa Siquijor halos tanan ang yara sa green category.
Ginkakilala ang isa ka lugar nga red category kun may yara sang presensya sang armado nga grupo, may mainit nga political rivalry kag may factor nga makonsiderar nga may threat sa paalabuton nga eleksyon.
Suno kay Castillano, napadala na nila ang rekomendasyon sa national office ilabi na sa committee on gun ban and security concern nga amo naga-aprubar kun sa ano nga kategorya madagdag ang isa ka lugar.
Suno diri, tubtob sa karun wala pa sila sang may nabaton nga official result halin sa national office.
Samtang, dugang pa ni Castillano, wala man sang may namonitor nga aktibidad sang New Peoples’ Army nga makahalit sa eleksyon.
Pahayag sini ang nagluntad nga engkwentro sa ciudad sang Cadiz kag Toboso ang indi makabig maka-epekto sa midterm elections.
