Gin-athag sang Comelec Officer sa syudad sang Bacolod nga indi Commission on Election ang masami nga nagapanguna sa Peace Covenant kundi Philippine National Police (PNP).
Apang sa karun ang Comelec ang gintugyanan sa pag-organisar sini kabulig ang iban pa nga mga ahensya kalakip na ang PNP, Armed Forces of the Philippines (AFP), Department of the Interior and Local Government (DILG) kasubong man ang religious sector.
Suno kay Atty Revo Sorbito, gin-invite nila ang tanan nga mga local candidates subong nga 2022 Elections nga magsunod sa mga ginapatuman nga pagsulundan, sa mga layi, Comelec resolutions agud nga mahimo ang eleksyon nga tampad kag masaligan.
Ang iban nga mga kandidato ang nagtambong naman sa programa pinaagi sa virtual attendance.
Ginpahibalo naman ini nga gin-unahan na sang Grupo Asenso sang Miyerkules ang Peace Covenant Signing bangod may nakaschedule nga aktibidad kahapon.
Paathag ni Atty Sorbito nga ang campaign guidelines ang mangin aplikable lang sa mga kandidato sa pag-umpisa na sang campaign period sa Marso 25.
Ginapasalamat naman sini nga ang common assessment sa karun sa syudad sang Bacolod maykaangtanan sa eleksyon ang nagapabilin nga generally peaceful.
Panawagan man sang Election Officer sa mga kandidato kag supporters nga magbulig man sa pagsunod sa guidelines.
Pahanumdom man sini sa mga magakampanya sa pag-umpisa sang local campaign period nga magkuha sang permit sa Comelec.
Pahanumdom man sini nga sa Comelec Resolution, may mga guidelines nga dapat masunod natuhoy sa pagkampanya.
Samtang nagtambong man kahapon sa Peace Covenant Signing sa Bacolod City Police Office Headquarters si Fr. Chris Gonzales nga nagrepresentar sang Diocese of Bacolod.
Ginpaathag sini nga nagapabilin ang Parish Pastoral Council for Responsible Voting (PPCRV) sa simbahan, nga nagapaninguha nga malab-ot ang handom nga matinlo, masaligan, accurate kag malinong nga eleksyon.
Kasubong man ang Gugma Banwa (GUBAN) nga grupo sang mga pamatan-on kag estudyante nga nagapadayun sa mga forums agud madugangan ang ihibalo sang mga botante partikular na ang mga pamatan-on.
Ini ang may tinutuyo nga makahuman sang mapinuslanon nga eleksyon nga magaresulta sa pag-uswag sang Pilipinas.
Pahanumdom man sang pari nga indi dapat ihatag ang tanan nga obligasyon sa kapulisan kag Comelec bangod tanan nga pumuluyo ang dapat nga may bahin man sa pagseguro sang kaayuhan sang Pungsod.
