Nagapati ang convenor sang Save the Sugar Industry Movement nga napressure si outgoing Sugar Regulatory Administrator David Thaddeus Alba rason kun ngaa ini ang nagresign.
Sa interview sang Bombo Radyo kay Wennie Sancho, humalin sang una, nagapanawagan na ang Sugar Industry Movement nga buwagon na lamang ang SRA bangud sa mga alegasyon sang korapsyon.
Suno kay Sancho, ang resignation ni Alba ang posible bangud sa pressure nga iya nagakabaton sa babaw.
Ginakwestiyon man sini kun paano majustify ang nag-abot nga mga imported nga kalamay antes pa man ang issuance sang Sugar Order No. 6.
Dugang pa sini nga tatlo lamang ka traders ang ginhatagan sang alokasyon sang imported sugar.
Suno kay Sancho, apisar nga maayo kuntani nga nagikan sa Negros Occidental ang SRA administrator, ila ginarespeto ang desisyon ni Alba nga posible iya nahimo bangud sa iya prinsipyo.
Wala man ini nagakomporme sa plano sang gobyerno nga ibaligya ang mga nakumpiskar nga smuggled sugar sa mga Kadiwa Centers.
Suno diri, ini ang bayolasyon sa layi bangud illegal ini nga butang kag indi nagakadapat nga ibaligya sa legal nga pamaagi.
