Padayon karun nga ginabulong sa isa ka pribado nga hospital sa ciudad sang Bacolod ang hepe sang kapulisan sa banwa sang Hinigaran matapos ini nga napilasan sang ginluthang sang suspetsado nga nagahurumentado sa ila nga puluy-an kaina sang udto.
Pasado las-12:00 sang udto sang nagresponder ang Hinigaran Municipal Police Station sa pagpamuno sang hepe nga si Police Chief Inspector Jake Barila sa puluy-an sang suspetsado nga si Dabi Ysasi, 32-anyos sa Hacienda Manucao-A Brgy. Palayog matapos nga nagpangayo sang responde ang adoptive mother sini nga si Victoria.
Nahibaluan nga pasado las-9:00 pa lang sang aga sang nagahurumentado na si Ysasi kag ginapaniro ang kasapatan sa palibot gamit ang 54 caliber pistol kag ginakastigo ang iya iloy bangud nga nagapangayo ini diri sang kwarta.
Sang pag-abot sang kapulisan, ginhaylo ini nga magsungka apang nagpinalupok ini kag naigo sa paa si Chief Inspector Barila apang nakabalos ini kag naigo man sa dughan ang suspetsado ugaling may ginasuksok ini nga bullet proof vest.
Gilayon nga gindala sa hospital si Barila kag diri na nagresponder ang 2nd Provincial Mobile Force sa pagpamuno ni Chief Inspector Roel Garingalao nga amo na ang naghaylo sa suspetsado nga magsungka.
Nagsungka si Ysasi sang madamo na nga dugo ang naguwa sa iya dughan kag diri narekober ang madamo nga mga armas kag bala.
Gindala naman ang suspetsado sa Corazon Locsin Montelibano Memorial Regional Hospital.
Samtang suno kay Garingalao tangkas-tangkas nga kaso ang pangatubangon sang suspetsado.
Suno diri kaso nga attempted murder, illegal possession of explosives kag pag manufacture sang bala ang pangatubangon sang suspetsado.
Ini matapos nga narekober sa paghinakop ni Ysasi sang nagsungka na ini ang lima ka clip sang bala sang 30 caliber machine gun, 5 ka clip sang 50 caliber machine gun, anti-personnel bomb nga ginagamit sang military, tripod sang machine gun, gun powder, reloading machine, head sang 9 mm, ice peak kag bullet proof.
Nahisayran kay Garingalao nga gingamit sang una nga headquarters sang airborne company sang Special Forces ang puluy-an sang suspetsado kag posible nga ginbilin sang tropa ang iban sa mga bala kag eksplusibo nga narekober diri.
Suno pa sa opisyal kuntani ginturn-over sang pamilya sa mga otoridad ang mga ginbilin sa ila sang Special Forces.
May yara man sang target range sa likod sang puluy-an sang mga Ysasi.
Santo naman sa pagpangusisa sang commander sa mga opisyal sang barangay nagagamit man sang iligal nga druga si Ysasi.
