Emosyonal nga nagpasalamat sa mga medical staff ang labing una nga pasyente sang COVID-19 sa probinsya sang Negros Occidental bangud nakagwa na ini sa ospital kahapon matapos mag-ayo na kag nagnegatibo sa repeat test.
Suno sa 41-anyos nga babayi nga residente sang EB Magalona, indi bastante ang pagpasalamat niya sa mga health workers sa Teresita Lopez Jalandoni Provincial Hospital sa Silay City bangud sa pag-atipan kag pag-atinder sang mga ini sa iya.
Suno sa iya, indi man basta-basta ang pag-discriminate nga gin-agyan sang mga nurse kag doktor sa gwa sang ospital.
Nagpangabay naman ini nga padayon nga ipangamuyo ang iban nga mga indibidwal nga nagasufrer sang nasambit nga balatian nga mag-ayo na.
Nahibaluan nga sa record sang Department of Health, siya amo ang PH1338 ukon ang Western Visayas Patient number 17.
Ang government employee ang may yara sang travel history sa Manila kag Davao.
Sang Marso 1, nagbyahe ang pasyente sa Manila kag nagbyahe man ini sa Davao sang Marso 6.
Sang Marso 8, nagbalik ini sa negros Occidental, nagbalik sa Manila pagkasunod nga adlaw kag nagpauli sang Marso 14.
Pagligad sang lima ka adlaw, nagbatyag ini sang sintomas sang hilanat kag makalipas ang apat ka adlaw, ini ang nag-ubo kag nabudlayan sa pagginhawa gani nagpadulong ini sa ospital.
Sang Marso 28, magagwa na kuntani sa ospital ang pasyente apang nag-abot man ang resulta sang iya COVID test sa diin nagpositibo ini sa balatian.
Ginpaidalom sa test ang bana, duha ka anak kag ginikanan sang pasyente apang lunsay nagnegatibo ang mga ini.
