Mas pasangkaron pa gid sang Covid Vaccination (COVAC) Council sa ciudad sang Bacolod ang information dissemination campaign angot sa vaccination program agud nga mas madamo sang mga pumuluyo ang willing nga mag-avail sang bakuna.
Madumduman nga una na ginpahayag ni Barangay Council President Lady Gles Gonzales Pallen nga yara lang sa 5 tubtob 10% ang luyag mag-avail sang COVID vaccine sa kada panimalay diri sa ciudad.
Sa interview sang Bombo Radyo Bacolod kay Dr. Chris Gonzales, deputy for medical data ang analysis sang Emergency Operations Center, ginpahayag sini nga ang mas masangkad nga information dissemination campaign ang solusyon agud mas madamo nga mga residente ang mapabakuna batok sa COVID-19.
Gani magapatigayon sila sang mga training sa mga Barangay Health Workers kag Barangay Health Emergency Response Team kag sa iban pa nga mga grupo nga magapanguna sa pagpatigayon sang vaccination agud mahatagan ang mga ini sang ihibalo tuhoy sa COVID vaccine kag may yara ang mga ini sang isabat sa mga pumuluyo nga nagapamangkot tuhoy diri.
