Padayon nga nagapanghanda ang COVID Vaccine (COVAC) Council sa ciudad sang Bacolod para vaccination program nga patigayunon.
Sa interview sang Bombo Radyo Bacolod kay Councilor Renecito Novero, pinuno sang COVID vaccination center team sang COVAC Council, ginpahayag sini nga nagsapol sila kahapon upod kay Mayor Evelio “Bing” Leonardia agud hambalan ang vaccination program sa ciudad kun sa diin naghatag sang report ang kada team.
Suno kay Novero, nakahanda na ang ciudad education campaign kag information drive nga patigayunon.
Ginpresentar naman sa meeting ang registration form nga ipanagtag sa kada barangay.
Suno sa konsehal, may pipila sila ka mga suhestyon nga gindugang agud mas mangin simple ang form.
Nagapangabay naman si Novero sa mga barangay officials nga magbulig gid ilabi na sa pag-edukar sang mga pumuluyo angot sa vaccination.
Magluwas diri, sila man ang responsable sa pagtipon, pagdul-ong kag pagpapauli sa mga nabakunahan nila nga mga residente.
Samtang, gin-ayo naman ang team ni Novero nga ifinalize na ang mga vaccination centers.
Una nga plano kuntani suno sa konsehal amo ang 20 ka mga vaccination centers apang basi indi ini mapun-an sang nagakaigo nga mga personnel, equipment kag logistics gani nga ila naistoryahan kagab-i nga magfinalize sang kapin 10.
Suno kay Novero, magalibot liwat ang iya nga team agud mavalidate kun pila kag ano nga mga lugar ang malakip sa vaccination centers.
