Padayun ang paglibot sang Women and Children Protection Desk, Department of Social Services and Development kag City Legal Office sa pagpatuman sang curfew for minors sa Bacolod City.
Nahibaluan nga may ordinansa ang ciudad nga nagadumili sa mga kabataan sa paggwa humalin alas-10:00 sang gab-i tubtob alas-4:00 sang kaagahon.
Madumduman nga sang damlag lang, ginmando man ni Department of the Interior and Local Government Secretary Jonvic Remulla ang estrikto nga pagpatuman sang curfew for minors.
Sa interview sang Bombo Radyo Bacolod kay Anjeannette Servano, social worker kag focal person sang Anti-Mendicancy Division sang Bacolod DSSD, ang WCPD ang adlaw-adlaw nga nagalibot sa mga dalanon, samtang ang Anti-Mendicancy Division upod sa City Legal ang nagalibot naman isa ka bes sa kada semana.
Ginatutukan sang mga ini ang mga menor de edad nga nagaliyong sa dalanon, kasubong man ang mga computer shops.
Ini bangod madamo sang mga kabataan nga nagakagab-ihan sa computeran.
Suno kay Servano, ginarescue nila ang mga maaktuhan nga mga kabataan kag ginaturn-over sa ginikanan.
Kun indi naman makita ang mga ginikanan, sila ang ginadala sa Barangay Hall.
Ginapatawag man ang ginikanan para sa dialogo bangod nagapati ang mga ini nga ang ginikanan ang may pinakadako nga papel sa pagseguro nga wala sa dalanon ang ila mga kabataan sa tion sang kagab-ihon.
Panindugan ni Servano nga kun estriktuhon sang ginikanan, bisan mas gusto sang mga kabataan nga magtinir sa gwa, sila ang wala sang mahimo.
Nahibaluan nga warning lamang ang ginahatag sa una nga madakpan, apang kun liwat nga madakpan, sila ang mahimo na nga mamultahan, magcommunity service ukon idetain sa isa ka pasilidad.
