Dako ang nangin pagbawi sang Dallas Mavericks sa Game 4 sang National Basketball Association (NBA) Finals matapos ginlutos ang Boston Celtics sa score nga 122-84.
Sa nangin hampang si Luka Doncic ang nakahimo sang 25 ka puntos sa first half pa lamang, sa kabug-usan sini nga 29 points samtang si Kyrie Irving ang nagbubo naman sang 21 ka puntos.
Ang Game 5 ang patigayunon alas-8:30 sa Martes sang aga sa Boston, Massachusetts.
Si Doncic kag Irving ang limitado nalang ang nangin playing time sa second half a baylo ini ang gindominar sang ila mga bench.
Kun sa diin nalab-ot sang Dallas ang 100-mark, nga wala pa nalab-ot sa una nga tatlo ka hampang, pinaagi sa three-point shot ni Tim Hardaway Jr.
Si Hardaway ang nagpaulan sang sunod-sunod nga tres kun sa diin sa pito sini ka three-point attempts siya ang nakapasulod sang lima.
Sa pihak nga bahin 15 points lamang ang napasulod ni Jayson Tatum sang Boston, 14 kay Sam Hauser samtang 11 puntos naman gikan kay Payton Pritchard.
Sa interview sang Bombo Radyo Bacolod kay Basketball Coach Leo Ceralbo, below average percentage ang three point shots sang Boston, samtang nagapaulan naman sang tres ang Dallas.
Manami suno diri ang team-man rotation nga gingamit sang Dallas, kun sa diin ila na nga ginpasulod ang mga bench kag ang mga ini ang nagacontribute sang puntos.
Bangod sa dako nga lead sa puntos sang Dallas, aminado si Ceralbo nga mas ginpili na lamang sang duha ka team nga pasudlon ang mga bench agud nga mapreparar ang mga key players sa Game 5 sa Martes.
Nagapati ini nga nagserbe na nga leksyon kay Dallas coach Jason Kidd ang una nga tatlo ka kapierdihan, nga indi masarangan sang duha lang ka players ang paglukdo sang hampang, kundi ginakinahanglan ang kolaborasyon sang tanan.
Samtang, makaluluoy naman suno kay Sports Analysist Monico Puentevella ang mga nagpusta sa Boston bangod halos malapit na sa game fixing ang natabo.
Suno diri, umpisa palang ginasuspetsuhan na sini nga magapapierde ang Boston bangod luyag nila nga magchampion sa ila home court.
Apang malaw-ay suno diri nga ihatag ang hampang kag magpalutos sa tuman ka dako nga deperensya sang puntos, nga mahimo kwestyonon sang NBA.
Isa pa sa nakita sini nga insulto sa mga fans ang pag-ilis na ni Doncic apisar nga 3rd quarter pa lamang, nga nagapakita nga natapos na ang hampang.
