Nagtukod sang deaf kiosk sa Bacolod City Public Plaza ang Bacolod Integrated Deaf Association.
Sa interview sang Bombo Radyo Bacolod sa founder nga si Joan Briones, madugay na sila nga nagahingyo nga mahatagan sang lugar para sa pagtililipon sang mga deaf kag mute, apang si Bacolod City Mayor “Albee” “Benitez ang nagpamati sa ila.
Sila ang nagkoordinar sa Sectoral Affairs Office.
Matapos mapahanugutan, ginrennovate sang mga ini ang isa sa mga waiting shed kag ginhimo nga daw kaangay sang tindahan, kag ang dingding ang human sa plantsa ukon galvanized sheet kag ini ang gintawag BIDA Bacolod Deaf Kiosk.
Paathag ni Briones nga sa iban nga mga local government units kaangay sa Manila, Quezon City, Cebu, Iloilo kag Siquijor may ara naman sang deaf kiosk sa plaza, kag kaangay nga Bacolod City nalang ang wala.
Plano man nila nga magbaligya sang mga produkto nga himo sang mga deaf sa nasambitan nga kiosk.
Apang sa pagkoordinar sang Bombo News Team kag City Legal Officer Atty Carlos Ting Jr., mahimo nga paluson ang kiosk nga gintukod sang grupo.
Ini bangod ang estraktura ang nagaguba sa desinyo sang plaza, samtang ginadumilian man ang mga nagabaligya sa lugar, magluwas sa mga rehistrado nga ambulant vendors.
