Nagdangat na sa 90.23 porsyento ang mga nademolish sa 10, 000 ka mga illegal structures nga na-identify sa mga merkado kag barangay sa ciudad sang Bacolod.
Sa interview sang Bombo Radyo Bacolod kay Executive Assistant Mr. Butch Soliguen, ginkumpirmar sini nga 17 na sa 61 ka mga barangay sa ciudad ang nagpasa sang report nga 100 per cent na sila nga natapos sa pagpanghawan sang road obstructions kasunod sang mando ni Presidente Rodrigo Duterte nga pangkakason ang mga illegal structures nga nagalaksam sang dalan nga magatapos sa Setyembre 27.
Suno kay Soliguen, sa 17 ka mga barangay nga nagpahayag nga 100 percent na sila nga tapos, 5 percent ukon tatlo tubtob apat ka mga barangay diri ang indi siya satisfied sa pagpanghawan.
Nagpahanumdum si Soliguen sa mga barangay nga may bilin pa nga mga illegal structures nga tapuson gid guba ang mga ini antes ang deadline.
Ginkumpirmar sang pinuno sang Department of the Interior and Local Government-Bacolod nga may yara sang validation team gikan sa Central Office kag Regional Office nga maga-tsekyar sa kada Local Government Unit (LGU) tuhoy sa road clearing operations.
Sa interview sang Bombo Radyo Bacolod kay DILG-Bacolod head Ma. Joy Maredith Madayag, ginpahayag sini nga pagkatapos sang deadline sa Setyembre 27, may magakadto nga validation team sa tagsa ka barangay agud kumpirmaron kun nagasanto ang ila report sa kahimtangan sang ila lugar.
Dugang pa ni Madayag nga wala pa karon sang guidelines nga ginpagwa apang posible nga magpangatubang sang nagakaigo nga kaso ang LGU nga mapamatud-an nga wala nagsunod sa mando.
Suno pa diri nga seryoso ang ila ahensya sa pagpatuman sang mando ni Presidente Rodrigo Duterte gani nga dapat seryosohon man ini sang tanan.
