Gindepensahan ni Gene Padilla ang utod sini nga si Dennis Padiila angot sa kasal sang bata ni Dennis nga si Claudia Barretto kay Basti Lorenzo.
Ginpost ni Dennis sa social media nga nangin bisita lang ini sa kasal kag wala nangin amay sang bride.
Sa post ginbutang ni Dennis nga nabudol ini bangod ang amay sang bride nangin bisita lang.
Ginpakigbahin ni Gene ang natabo sa utod sini sa wedding nga suno sa iya ala-1:00 sang hapon ara na sila sa simbahan.
Suno pa diri, alas-5:00 pa lang sang kaagahon nagbugtaw na ang ila iloy bangod excited ini kasubong man ang magulang sini para sa kasal sang iya bata.
Ginpahayag ni Gene, nga subong lang ini nakawitness sang kasal nga indi na part sang program ang amay sang bride.
Bisan ang mga event organizer wala man naghambal sa ila nga indi sila kabahin sang programa kag wala man nadala sa entourage nga magalakat sa tunga padulong sa atubang sang altar.
Nangin emosyonal naman si Dennis sang nahibaluan nga wala ini sang papel sa wedding.
Ginpamangkot nila kun diin mapungko ang ila iloy kag ginhambalan nga bisan diin lang kag ang amay sang bride ang mapungko na lang kuno sa tupad sang mga maninoy kag amo nga sila nga duha nga mag-utod ang nagdesisyon nga magpungko na lang sa likod.
Nagtulo ang luha ni Dennis sa natabo kag nagsuhestyon si Gene nga mapauli na lang tapos ang kasal kag magpapiture sa ginkasal.
Nalooy man ini sa ila iloy nga nasakitan sa natabo.
Mensahe ni Gene sa mga bata ni Dennis kag sa iloy nila nga si Marjorie Barretto, nga madugay na nga nagapangayo sang atensyon ang ila amay sa ila kag nagpamangkot kun ini bala ang ginpa-intindi sa ila sang mga tawo sa ila palibot.
Dugang pa sini, halos luho kag pagkasikat ang may yara sa ila sa pamilya Barretto samtang sila naman nanday Dennis naanad sa kapigaduhon kag wala gid man sila nagaka-angay sa pihak nga pamilya.
