Indi makapasalig ang opisyal sang Department of Justice (DOJ) nga ang gobyerno ang magapasugot sa kondisyon sang pinuno sang Kingdom Jesus Christ (KOJC) nga si Pastor Apollo Quiboloy para kay President Ferdinand “Bongbong” Marcos Jr. nga mag-issue sang isa ka written declaration nga indi ini pag-render sa Estados Unidos, kun sa diin siya ang nagapangatubang sang conspiracy to engage in sex trafficking by force, coercion, kag sex trafficking of children.
Suno kay DOJ Undersecretary Raul Vasquez sa isa ka press briefing nga ang nasambit nga legal issue ang dapat nga matun-an sang insakto.
Ginpamangkot man si Vasquez sang komento sang abugado ni Quiboloy nga si Atty. Israelito Torreon nga dapat nga mag-issue sang isa ka written declaration ang presidente nga indi ini pag-render sa Estados Unidos ang pastor.
Nagpanindugan naman si Vasquez nga wala sang bisan sin-o sa gobyerno nga makapasalig nga mahatagan sang katumanan ang ginahingyo sang pastor.
Nagpanindugan ang DOJ nga ang Pilipinas ang nakahigot sa extradition treaty sa Estados Unidos.
Suno pa sa opisyal sang DOJ, una sa tanan, wala sang bisan sin-o nga opisyal sang gobyerno nga maluyag maglapas sang layi kag tanan nga treaties ang ginapatuman sa tion nga naconfer kag napirmahan sang senado.// Obligasyon man ini sang bisan sin-o nga nagapungko nga lider sang estado.
