BACOLOD CITY – Ginmandu sang Department of Education Negros Island Region (DepEd-NIR) sa mga eskwelahan sa Region 18 nga akomodaron ang mga kabataan nga nagbakwit gikan sa Marawi City kag iban pa nga bahin sang Mindanao nga luyag mag-eskwela diri.
Ini ang ginpahayag ni DepEd-NIR Director Dr.Gilbert Sadsad kasunod sang report nga may 37 ka mga pamilya ukon 80 ka mga indibidwal nga ginakabig internally-displaced families nga nagbakwit sa Negros Oriental, partikular sa ciudad sang Dumaguete, kasunod sang kalakasan sang Maute Terror Group sa Marawi.
Suno kay Sadsad, sadtong Byernes lamang sini gin-issue ang memorandum kag wala pa ini sang may nabaton nga report sa karon tuhoy sa kadamuon sang mga kabataan gikan sa Mindanao nga nagsaylo sa pag-eskwela sa NIR.
Apang ginalauman nga madugangan pa ang mga ini base sa impormasyon nga nakuha sang natungdan nga mga ahensiya sang gobyerno nga ginpahayag sa ginpatigayon nga regional peace and order council meeting sa Negros Oriental sang damlag lang.
Ginalantaw nga sa kadamuon sang mga nagbakwit kag luyag pa magpadulong sa NIR, indi lamang sa Negros Oriental magadangop ang mga ini kag daku ang posibilidad nga magalab-ot pa sila sa Negros Occidental, partikular sa ciudad sang Bacolod.
