BACOLOD CITY – Tatlo ka mayor nga mga problema ang ginpangatubang sang Department of Education (DepEd) sa una nga semana sang klase sa Negros Island Region (NIR).
Ini ang ginpahayag ni Dr. Gilbert Sadsad, ang director sang DepEd-NIR, sa interview sa Good Morning, Philippines Program sang Bombo Radyo Bacolod.
Suno kay Dr. Sadsad, ang pagbukas sang klase sadtong Hunyo 5 ang ginsugata sang daku nga problema sa mga wala pa matapos nga classrooms kag buildings sa mga eskwelahan.
Wala pa man ma-deliver ang mga text books nga pagagamiton sang mga estudyante kag may mga buluthuan pa nga wala sang pulungkuan sa mga hulot-klasehan.
Apang ginklaro ni Dr. Sadsad nga ang nasambit nga mga problema ang temporaryo nga napangitaan sang solusyon sang mga school heads.
Sa bahin sang classrooms, nagpangita sang mga bakante nga kwarto agud mapatigayunan sang klase samtang may mga eskwelahan naman nga nagpatigayon sang double shifting.
Ang kakulang sang libro ang nasolusyunan paagi sa pag-access sang mga manunudlo sa internet sang ila topic guide sa una nga bulan sang klase.
Sa problema sa kakulang sang pulungkuan, gin-ayu sang mga manunudlo ang ila mga estudyante nga magdala sang ila kaugalingon nga pulungkuan samtang may mga eskwelahan naman nga nagbakal sang mga monoblocks agud mag-akomodar sang ila mga kabataan.
