BACOLOD CITY — Yara na sa lebel sang grievance committee sang division office ang pag-settle sang konflikto sa tunga sang maestro nga si Jose Ernie Buelos kag maestra nga si Emelyn Mercorio sang Paglaum Village National High School agud nga indi na maglala.
Sa interview sang Bombo Radyo kay Department of Education Region 6 Director Gemma Ledesma nga yara sa karon sa Singapore, iya ginpahayag nga wala pa nakalab-ot sa regional office ang impormasyon tuhoy sa pag-inaway nanday Buelos kag Mercorio sang Martes.
Sa kaangay sini nga sitwasyon suno kay Ledesma, may yara sang grievance committee ang division office ukon ang eskwelahan mismo nga amo ang magahusay sa magtimbang nga partido bangud dira mismo ang mga imbolbado.
Suno kay Ledesma, magasaka lang ini sa regional office kun kinahanglanon ang disciplinary action sa kaso administratibo kag kriminal bangud ang regional director ang disciplining authority.
Ini ang kabahin sang due process nga ginasunod sang DepEd.
