Gin-athag sang public information officer sang Department of Education (DepEd) Region 6, nga wala ang ahensya nagalagas nga malapawan ang numero sang enrollees sang nakaligad nga School Year, sa baylo ang target amo nga wala sang kabataan nga indi mahatagan tyansa nga makatuon.
Sa interview sang Bombo Radyo Bacolod kay Hernani Escullar Jr., ang mga magatungtong sa lima ka tuig tubtob Setyembre, ang sarang na nga makasulod sa Kinder Garten.
Apang apisar nga mas manghod pa diri, may ginapatigayon man nga Early Childhood Development (ECD) test nga magatumod kun masarangan na sang bata ang pagtuon.
Paathag ni Escullar nga target sang DepEd nga maseguro nga ang tanan nga kabataan ang yara sa classrooms kag nagatuon.
Suno diri, bisan pa malapawan ang number of enrollees nakaligad nga School Year kun wala nagasulod sa classrooms wala man gihapon sang kapuslanan.
Sa karun todo naman ang kampanya sang mga school personnel para sa enrollment.
Samtang kun indi naman makasulod sa regular class, may-ara man sang Alternative Learning System (ALS).
Masako naman sa karun ang mga manunudlo partikular na ang mga mahandle sang Kinder Garten, Grade 4 kag Grade 7, nga maga-implementar sang MATATAG Curriculum.
Suno kay Escullar, bangod break sang mga manunudlo sang Hunyo ang School Heads ukon principal anay ang gincapacitate sa pagpatuman.
Gani karun nga balik na ang mga manunudlo sa eskwelahan ang mga principal naman ang magatudlo sa mga manunudlo sa grade level.
Nagapati ini nga dako ang impact sang MATATAG Curriculum bangod madecongest ang curriculum kag ini ang magapadayun apisar sa pagpanaog ni Vice President Sara Duterte bilang DepEd Secretary epektibo sa Hulyo 19.
Pasalig ni Escullar nga magapadayun lamang ang DepEd sa paghatag sang dekalidad nga edukasyon.
