Nagpadulong ang katapo sang National Bureau of Investigation (NBI)-Bacolod sa balay nanday Trisha Antiquera, anak ni Lorebelle Antiquera, ang isa sa mga gin-abduct sa Barangay Vista Alegre, Bacolod City bilang kabahin sang ila imbestigasyon.
Sa interview sang Bombo Radyo Bacolod kay Trisha Antiquera, nagkadto ang katapo sang NBI sa balay nga ginaistaran sang iya iloy kag sang live in partner sini nga si Joen Villacojer.
Suno kay Trisha, ginpabuksan sa iya ang mga makita sang NBI personnel kag pila sa mga nakita sa kwarto sang iya iloy kag ni Joen amo ang plastic sachets nga ginasuspetsuhan putos sang illegal nga druga kag may yara pa nga wig nga lain-lain ang color.
Suno pa diri, may yara man sang nakita ang NBI agent sa basurahan nga plastic nga ginasudlan sang ice nga ginalantaw man ginsudlan sang illegal drugs nga may ngalan nga Lorebelle kun sa diin ginalantaw sang NBI nga ginagamit ni Villacojer ang ngalan sang iloy ni Trisha sa illegal nga transaction.
Ginpahayag man sini nga may yara man sang nakita nga mga asin kag harina nga gindala man sang NBI personnel nga makabulig sa ila imbestigasyon.
Nagpanindugan man ini nga wala nagabaligya sang illegal nga druga ang iya nga iloy bangud kun nagabaligya ini, madugay na sila nga nagmanggaranon.
Sa karon, nagahulat sila sa gihapon sang resulta sang imbestigasyon angot sa kaso sang tatlo sini ka mga himata nga gin-abduct.
