Wala gina-rekomendar sang Department of Health ang pag-inom sang mga bulong nga ginapahayag makabulong sa dengue hemorrhagic fever.
Nahibaluan nga may isa ka grupo nga nagpanawagan sa DOH nga tun-an ang benepisyo sang pag-inom sang tawa-tawa para sa dengue.
Sa interview sang Bombo Radyo Bacolod kay Dr. Grace Tan, pinuno sang Environment and Sanitation Division sang City Health Office, wala pa sang pagtuon nga naga-aprubar sa mga bulong nga safe imnon para sa dengue, kaangay sang tawa-tawa.
Santo sa data sang CHO, suno kay Tan, nagadangat na sa 1,325 suspected dengue cases ang narekord sa Bacolod City para sa morbidity week 33 kun sa diin anom na ang patay.
100 porsyento ini nga mas mataas sangsa pareho nga period sang nagligad nga tuig nga may yara lamang sang 643 suspected dengue cases nga may lima nga patay.
Isa ka 16-anyos nga bata nga lalaki nga taga-Barangay Singcang Airport ang ulihi nga napatay sang Agosto 1.
Nagapanguna naman ang Barangay Estefania sa may pinakamadamo nga kaso sang dengue sang ciudad nga may 162 cases nga ginasundan sang Barangay Tangub, Villamonte, Taculing, Alijis, Mandalagan, Granada, Mansilingan, Pahanocoy kag Handumanan.
Liwat nga nagapahanumdum si Tan sa publiko nga padayunon lamang ang pagpaninlo agud matapna ang pagdamo sang mga lamok.
