Opisyal na nga nagpanumpa si Donald Trump bilang ika-47 nga presidente sang Estados Unidos kaina sang kaagahon sa isa ka indoor activity sa US Capitol.
Si Trump ang nagtake-oath sa atubang ni Chief Justice John Roberts.
Antes ini, una nga nagpanumpa ang iya vice president nga si JD Vance sang Ohio.
Ginalauman nga madamo nga executive order ang mapermahan sa una nga adlaw sa pagbalik sang 78-anyos nga Republican sa pwesto kaangay sang napulo ka mga EO nga nagafocus sa border security kag immigration nga amu ang iya prayoridad.
Suno kay Trump, magadeklarar ini sang national emergency sa southern border, magapadala sang armado nga tropa, kag padayunon ang polisa nga magamando sa asylum seekers nga maghulat sa Mexico sang ila nga US court dates.
Tapuson man ni Trump ang birthright citizenship sa US-born children nga ang ginikanan wala sang legal status, nga ginlaragway sang legal scholars bilang ‘unconstitutional.’
Ang inagurasyon ni Trump ang nagamarka sang madinalag-on nga pagbalik sini sa pulitika matapos nalampuwasan ang duha ka mga impeachment trials, na-convict sa criminal case, na-indict sa tuyo nga baliskadon ang iya pagkalutos sang 2020, kag nalampuwasan man ang duha ka mga assassination attempts sang siya ang nagapangampanya.
Yara man sa inagurasyon sanday former US President Joe Biden kag former Vice President Kamala Harris kaupod sanday former presidents Barack Obama, George W. Bush kag Bill Clinton.
Yara man sa entablado ang mga bilyonaryo nga sanday Tesla kag SpaceX CEO Elon Musk, Amazon CEO Jeff Bezos kag Meta CEO Mark Zuckerberg.
Ang nasambit nga mga tech executives ang nakapwesto sa tupad sang cabinet members kag sa mga miyembro sang pamilya ni Trump.
