Gin-athag naman sang pamilya ni Angelica Montalvo nga indi ka live-in sang dalaga si Mark Carson Epsilon nga amo ang nagamaneho sang kotse sang natabo ang hold-up kundi ex-boyfriend niya ini.
Ginpakigbahin sang mga kaupod ni Montalvo sa Bombo Radyo nga sang nag-abot sila sa Medical Plaza sa BS Aquino Drive, hana na kuntani sila nga magpanaog sa kotse para sa check-up ni Montalvo.
Apang hinali lang nga may nagsulod nga wala nakilal-an nga lalaki nga nakasuksok sang facemask.
Suno sa pamilya, singkit man ang mata sang suspetsado.
Matapos ang pagdeklarar sang hold-up, ginpalakat ang salakyan kag ginapaduko man sila samtang nagalakat ang salakyan kag sang nakaabot na sila sa atubang sang Oroland Subdivision, nakabati sila sang tatlo ka lupok kag gilayon man nga nagsakay sa motorsiklo ang wala makilal-an nga suspetsado.
Gindumdom sang mga kaupod ni Montalvo nga nalipungan lang ini bangud nag-us-os ini sa pulungkuan kag sang gintsekyar nila ini, nakita nga may igo na sa ulo sang wala matumod nga armas-luthang.
Si Montalvo ang ginbutangan sang steel bangud ginbungguan ini sang salakyan sang tinalikdan nga tuig.
Gina-aligar man sang pamilya sang biktima nga ang ex-boyfriend man sang biktima ang nagbunggo diri sang nakaligad nga tuig santo man sa gintuad nga mga witness apang sa ulihi nag-isol ang mga ini.
