Bacolod City—– May ginatutukan na nga anggulo ang Guihulngan City Police Station sa pagtiro-patay sa driver sang Vice Mayor sang ciudad kahapon sang kaagahon.
Suno kay Police Superintendent Mario Baquiran, hepe sang nasambit nga police station, personal kag love triangle ang nakit-an nila nga motibo sa pagpatay kay Leonidas Dausan nga apat na ka tuig nga driver ni Guihulngan City Vice Mayor Ernesto Reyes kag anay caretaker sang farm and poultry nga ginapanag-iyahan sang isa ka Sangguniang Bayan member.
Sa inisyal nga impormasyon sang kapulisan, may napabusong nga babayi si Dausan apang may live-in partner na ang babayi kag ang biktima ang kasado man.
Si Dausan ang ginluthang sa isa ka gasoline station sa nasambit nga ciudad kag nasalabat naman ang pump boy nga si Erik Dela Torre.
Lima ka igo sang bala ang naangkon sang biktima nga nagtuga sang iya gilayon nga kamatayon samtang indi naman patal ang pilas ni Dela Torre.
Narekober sa lugar ang pito ka empty shell sang caliber .45 pistol.
Sa karon, padayon pa ang imbestigasyon sang Guihulngan City Police Station sa insidente.
