Plano sang Bacolod City National High School nga dugangan ang metal detector nga ihamtang sa entrance sang eskwelahan.
Sa interview sang Bombo Radyo Bacolod kay Richard Gelangre, School Principal sang Bacolod City National High School, sa tatlo ka semana sang nag-umpisa ang klase, wala sang may nakumpiskar nga deadly weapon sa mga estudyante apang justifiable naman kun may yara sang dala nga gunting ang estudyante nga ginagamit sa sulod sang classroom.
Suno diri, may naeksperyensyahan nga paglaba sang pila sa entrance bangod kalabanan sa mga estudyante late na nag-abot.
Agud ma-address ang problema, plano ni Gelangre nga dugangan ang metal detector kag ang mga nagabantay sa gate para madasig ang pagsulod sang kabataan.
Apang, nagapanawagan ini sa mga kabataan nga indi magpa-late para makasulod pa sa una nga klase sa aga.
Dugang pa ni Gelangre, iya ginapanugyan sa mga estudyante nga indi maglumpat sa pader sang eskwelahan para mag-eskapo sa klase bangod delikado kun matapakan nila ang mga buka nga botilya kag nagpaandam man ini sa mga estudyante nga nagalusot sa tamburong para lang makagwa sa eskwelahan.
