Gin-athag sang provincial director sang Department of Trade and Industry (DTI) Negros Occidental nga indi sakop sang ila trabaho sa pagmonitor sang presyo ang mga agricultural products magluwas lamang kun magrequest ang Department of Agriculture (DA).
Madumduman nga ginatudlo sang presidente sang Alliance of Hog Raisers Association of Negros Occidental (AHRANO) nga ang mataas nga presyo sang feeds ang isa man ka rason nga nagsaka ang presyo sang ginabaligya nga buhi nga baboy.
Sa interview sang Bombo Radyo Bacolod kay DTI Negros Occidental head Rachel Nufable, ginpahayag sini nga ang basic needs and prime commodities gid lamang ang ila gina-monitor samtang ang mga agricultural products kaangay sang feeds ang indi nila sakop.
Magluwas lamang kun magrequest ang DA nga buligan sila sa pagmonitor sang presyo kaangay na lamang sini nga semana kun sa diin ginpamonitor sila sang presyo sang pork sa wet markets kag sa supermarket kag nagpasa sang report.
Suno kay Nufable, indi pareho sa mga manufactured basic needs and prime commodities, wala sila nagahatag sang suggested retail price (SRP) para sa mga agricultural products.
