Patay ang duha ka senior high school student matapos makabunggo ang ginamaneho nga motorsiklo sa nakaparada nga truck sa Provincial Road, Hda Pangarap, Barangay Tabo, Ilog kahapon sang udto.
Sa interview sang Bombo Radyo Bacolod kay Police Major Joseph Partidas, hepe sa Ilog Municipal Police Station, natabo ang insidente alas-12:40 sang udto kahapon sa nabukid na nga bahin sang banwa.
Sa imbestigasyon, nahibaluan nga ang duha ka Grade 11 student ang sakay sa Yamaha Mio 125 nga motorsiklo.
Suno diri, ang duha nga edad 16 kag 17 anyos ang gikan sa balay sang driver kag igadul-ong kuntani sini ang backrider sa iya balay sa Sitio Enclaro sa nasambitan nga banwa.
Apang pagdangat sa lugar sila ang hinali nga nagbunggo sa truck nga may karga nga tubo nga nakapark sa higad sang dalan.
Nahibaluan nga ang driver sang truck ang may talamnan sa lugar, gani siya ang nagdulog agud magkuha sang tubig sa bubon sini sa lugar, apang nakibot na lamang ini sang may nagbunggo sa likod nga bahin sang truck.
Pahayag naman sang pila ka eyewitness nga madasig ang pagpadalagan sang motorsiklo.
Ginalantaw naman ni Partidas nga mahimo nagadugsing ang duha samtang nagamaneho gani wala nila nalikawan ang nakapark nga truck.
Aminado man ang hepe nga nagalaksam ang goma sang truck sa highway bangod kalog na sa kilid sang dalan, apang ini ang wala man nagatuga sang obstruction.
Samtang wala naman ini sang early warning device bangod makadali lang ang pagdulog sini sa dalan, kag masanag man ang lugar bangod udtong adlaw.
Samtang wala naman nakasuksok sang helmet ang duha ka estudyante.
Ginhingagaw pa dala sa Kabankalan City District Hospital ang duha ka biktima apang gindeklarar nga dead on arrival.
Suno kay Partidas, gindala nila sa Ilog Municipal Police Station ang driver kag helper sang truck para sa imbestigasyon, samtang nakasugilanon naman sang mga ang pamilya sang mga kabataan.
Bangod sa natabo, luyag sang Ilog Municipal Police Station nga pasanyugon pa ang pagbantay sa mga menor de edad nga nagadrive, kag sila ang magakoordinar man sa mga Barangay sa pagpatuman.
Panawagan sini sa mga ginikanan nga dumilian ang mga menor de edad sa pagdrive sang salakyan ukon motorsiklo ilabi na nga wala ang mga ini makalabay sa nagakadapat nga seminars.
