Dump truck nga nadulaan sang preno, nakabunggo sa tricycle antes nahulog sa pil-as

Ara na sa luwas nga kahimtangan ang mga indibidwal nga nasamaran sa nagluntad nga aksidente sa Purok Buta, Barangay Caliling, Cauayan, Negros Occidental Martes sang hapon, June 25.

Sa interview sang Bombo Radyo Bacolod kay Engr. Louie Lagulao, pinuno sang Municipal Disaster Risk Reduction and Management Office sang Cauayan, dump truck kag tricycle ang imbulbado sa aksidente.

Suno kay Lagulao, nadulaan sang preno ang dump truck nga sugata sang tricycle sa taklaron nga bahin sang dalan gani sila ang nagbungguanay.

Nahulog ang dump truck sa pil-as nga nagataas sang 5 meters.

Ang apat ka mga biktima nagikan sa tricycle kag dump truck ang gindala sa Cauayan District Hospital kag maayo na ang ila nga kahimtangan.