Wala nangin upang ang edad sa isa ka passer sang Agriculturist Licensure Exam.
Sa interview sang Bombo Radyo Bacolod kay Diosdado Evangelista, 72 anyos, Agriculturist Licensure Exam passer nga residente sang Barangay West, Candoni, Negros Occidental, sa edad nga 65 anyos nagdesisyon nga liwat ini nga magtuon gani nagpaenrol sa Central Philippines State University (CPSU)-Candoni sa kurso nga Education apang nag-shift ini bangud gintak-an ini nga magbalik-balik sa eskwelahan.
Suno kay Evangelista, sang nagbukas ang kurso nga agriculture nagpasaylo ini bisan nga Agricultural Business ang major.
Na-enroll man ini sa nasambit nga kurso sa bulig man sang ila nga school administrator.
Sa pihak sang mga insulto, pagdisgusto sang iya nga pamilya kag paglabutaw sang madamo nga mga kabataan nagpadayon ini nga may dedikasyon kag determinasyon tubtob nga nakatapos.
Sang 2024 November nagkuha ini sang Agriculturist Licensure Exam apang wala nakapasar.
Sang 2025 November nagkuha ini kag nakapasar.
Gindayaw man siya ni DAR Secretary Conrado Estrella nga apisar sang iya edad nagtinguha ini kag nakakuha sang lisensya.
Nagpanugyan ini sa mga pamatan-on nga magtuon, likawan ang mga butang nga makaguba sa ila nga pagtuon kag magpangamuyo gid.
Sa karun si Evangelista ang nagatrabaho bilang Job Order sang banwa matapos nga mahire sadtong 2022.
