Pila na ka bulan nga wala sang ulan sa southern Negros Occidental bangud sa El Niño.
Duha na ka mga banwa sa probinsya sang Negros Occidental ang nagdeklarar sang state of calamity bangud sa halit nga tuga sang El Niño phenomenon sa mga pananom.
Sa session sang ila Sangguniang Bayan, nagdeklarar naman sang state of calamity ang banwa sang Isabela.
Sa datos nagikan sa Municipal Agriculture’s Office sang Isabela, malapit P10 milyon ang halit sang tuman kainit nga panahon sa humay, tubo kag mga utanon sa 12 ka mga barangay sa banwa.
Sa interview sang Bombo Radyo kay Isabela Mayor Joselito Malabor, P7 milyon ang balor sang halit sa humay samtang ang nabilin nga P3 milyon ang halit sa iban nga pananom kalakip na sa tubo.
Suno kay Malabor, wala pa natumod ang kalaparon sang tubo nga apektado sang dry spell apang aminado ini nga malapad nga katubuhan ilabi na sa nabukid nga barangay ang nalaya.
Ang mga big planters suno sa iya ang may yara sang irigasyon apang kulang gid ang tubig sa ginatalauma sang magagmay nga mga sugarcane planters.
Ang local government unit sang Isabela may yara sang P2.5 million nga Quick Response Fund sa ila calamity fund kag katunga lang sini ang gastuhon sa karon bangud kinahanglan man nga handaan ang mga bagyo sa masunod nga binulan.
