Patay ang anay opisyal sang Philippine Navy kag isa na sa karon ka negosyante matapos ginluthang sang riding-in-tandem suspects sa Silay City alas-8:00 kaina sang aga.
Ang biktima ang ginkilala kay Jose Lindy Chan, residente sang Brgy. 5, Silay City.
Suno kay Nelia Opus, asawa sang abyan ni Chan nga si Jake Opus, naga-istorya ang biktima kag ang iya bana sa gwa sang balay sang mga Opus sa Bonifacio Extension, Brgy. 4 sang hinali lang naglabay ang mga suspetsado nga nagasakay sa motorsiklo kag gintiro sang makapila ka beses si Chan.
Nakaangkon ang anay Navy member sang apat tanan ka mga pilas nga ginalakipan sang isa ka ilok kag tatlo sa likod.
Gindala pa ini sa Teresita Lopez Jalandoni Provincial Hospital apang gindeklarar sang doktor nga patay.
Suno kay Dr. Vicente Iturriaga, nakaagom si Chan sang massive internal bleeding kun sa diin naigo ang iya pila ka internal organs nga gintunaan sang iya kamatayon.
Nakapalagyo naman ang suspetsado apang may narekober nga pila ka mga items kasubong sang bonnet, jacket kag isa ka helmet sa isa ka subdivision malapit sa crime scene.
Samtang, sa interview sang Bombo Radyo Bacolod kay Police Major Rollie Pondevilla hepe sang Silay City Police Station, nasapwan sa crime scene ang siyam ka empty shells sang .45 caliber pistol.
Suno kay Pondevilla, personal nga motibo ang nakit-an nga rason sa krimen.
Nahibaluan man nga ikaduha na ini nga threat sa kabuhi ni Chan.
Si Chan ang nangin isa ka negosyante kag contractor matapos nagretiro bilang pinuno sang Maritime Command sa Negros Occidental.
