Ginpirmahan na ni Governor Eugenio Jose “Bong” Lacson ang Executive Order No. 45 Series of 2020 nga nagapatuman sang temporaryo nga pagpasirado sang tanan nga pampubliko kag pribado nga mga memorial parks, cemeteries kag columbaries sa Negros Occidental halin Oktubre 30 tubtob Nobyembre 2, 2020.
Madumduman nga sang Setyembre 15, gin-anunsyar sang gobernador nga pagasiraduhan ang tanan nga pampubliko nga sementeryo sa Negros Occidental sa nasambit nga petsa matapos ang ginapatigayon sini nga virtual meeting upod ang mga alkalde sang mga ciudad kag banwa sa probinsya.
Suno sa iya, nahisugtan sang tanan nga mga alkalde sang mga ciudad kag banwa sa probinsya nga suspendihon ang selebrasyon sang tigkalalag agud malikawan ang mass gathering.
Suno sa iya, paagi sa pagsuspendi sang selebrasyon sang tigkalalag, mas maganubo ang posibilidad nga magalapta ang virus.
Suno kay Lacson, ang mga persona ukon establisyimento nga magabayolar sang ini nga pagsulundan, subong man sang mga health protocols nga ginapatuman sang Department of Health, inter-agency task force kag Province of Negros Occidental ang magapangatubang sang administrative ukon criminal charges.
Ang nasambit nga executive order ang mangin epektibo sa Oktubre 30, alas 12:01 sang kaagahon tubtob alas 11:59 sang gab-i sa Nobyemre 2, 2020.
